[30] สเหตุกํ กุสลํ ธมฺมํ ปฏิจฺจ นสเหตุโก นกุสโล ธมฺโม อุปฺปชฺชติ เหตุปจฺจยาฯ เหตุยา เอกํฯ

สเหตุกํ อกุสลํ ธมฺมํ ปฏิจฺจ นสเหตุโก นอกุสโล ธมฺโม อุปฺปชฺชติ เหตุปจฺจยา… เหตุยา ตีณิฯ

อเหตุกํ อพฺยากตํ ธมฺมํ ปจฺจยา นอเหตุโก นอพฺยากโต ธมฺโม อุปฺปชฺชติ เหตุปจฺจยาฯ เหตุยา เอกํฯ

3-1. เหตุสมฺปยุตฺตทุก-กุสลตฺติกํ

[31] เหตุสมฺปยุตฺตํ กุสลํ ธมฺมํ ปฏิจฺจ นเหตุสมฺปยุตฺโต นกุสโล ธมฺโม อุปฺปชฺชติ เหตุปจฺจยาฯ เหตุยา เอกํฯ

เหตุสมฺปยุตฺตํ อกุสลํ ธมฺมํ ปฏิจฺจ นเหตุสมฺปยุตฺโต นอกุสโล ธมฺโม อุปฺปชฺชติ เหตุปจฺจยา… เหตุยา ตีณิฯ

เหตุวิปฺปยุตฺตํ อพฺยากตํ ธมฺมํ ปจฺจยา นเหตุวิปฺปยุตฺโต นอพฺยากโต ธมฺโม อุปฺปชฺชติ เหตุปจฺจยาฯ เหตุยา เอกํฯ

4-5-1. เหตุสเหตุกาทิทุกานิ-กุสลตฺติกํ

[32] เหตุ เจว สเหตุโก จ กุสโล ธมฺโม นเหตุสฺส เจว นอเหตุกสฺส จ นกุสลสฺส ธมฺมสฺส อารมฺมณปจฺจเยน ปจฺจโยฯ เหตุ เจว สเหตุโก จ กุสโล ธมฺโม นอเหตุกสฺส เจว นน จ เหตุสฺส นกุสลสฺส ธมฺมสฺส อารมฺมณปจฺจเยน ปจฺจโยฯ เหตุ เจว สเหตุโก จ กุสโล ธมฺโม นเหตุสฺส เจว นอเหตุกสฺส จ นกุสลสฺส จ นอเหตุกสฺส เจว นน จ เหตุสฺส นกุสลสฺส จ ธมฺมสฺส อารมฺมณปจฺจเยน ปจฺจโยฯ (3)

สเหตุโก เจว น จ เหตุ กุสโล ธมฺโม นอเหตุกสฺส เจว นน จ เหตุสฺส นกุสลสฺส ธมฺมสฺส อารมฺมณปจฺจเยน ปจฺจโยฯ สเหตุโก เจว น จ เหตุ กุสโล ธมฺโม นเหตุสฺส เจว นอเหตุกสฺส จ นกุสลสฺส ธมฺมสฺส อารมฺมณปจฺจเยน ปจฺจโยฯ

สเหตุโก เจว น จ เหตุ กุสโล ธมฺโม นเหตุสฺส เจว นอเหตุกสฺส จ นกุสลสฺส จ นอเหตุกสฺส เจว นน จ เหตุสฺส นกุสลสฺส จ ธมฺมสฺส อารมฺมณปจฺจเยน ปจฺจโยฯ (3)

เหตุ เจว สเหตุโก กุสโล จ สเหตุโก เจว น จ เหตุ กุสโล จ ธมฺมา นเหตุสฺส เจว นอเหตุกสฺส นกุสลสฺส ธมฺมสฺส อารมฺมณปจฺจเยน ปจฺจโยฯ เหตุ เจว สเหตุโก กุสโล จ สเหตุโก เจว น จ เหตุ กุสโล จ ธมฺมา นอเหตุกสฺส เจว นน จ เหตุสฺส นกุสลสฺส ธมฺมสฺส อารมฺมณปจฺจเยน ปจฺจโยฯ เหตุ เจว สเหตุโก กุสโล จ สเหตุโก เจว น จ เหตุ กุสโล จ ธมฺมา นเหตุสฺส เจว นอเหตุกสฺส นกุสลสฺส จ นอเหตุกสฺส เจว นน เหตุสฺส นกุสลสฺส จ ธมฺมสฺส อารมฺมณปจฺจเยน ปจฺจโยฯ (3)

อารมฺมเณ นวฯ

[33] เหตุ เจว สเหตุโก จ อกุสโล ธมฺโม นเหตุสฺส เจว นอเหตุกสฺส นอกุสลสฺส จ ธมฺมสฺส อารมฺมณปจฺจเยน ปจฺจโยฯ (เอเตน อุปาเยน นว ปญฺหา กาตพฺพาฯ)

[34] เหตุ เจว สเหตุโก จ อพฺยากโต ธมฺโม นเหตุสฺส เจว นอเหตุกสฺส จ นอพฺยากตสฺส ธมฺมสฺส อารมฺมณปจฺจเยน ปจฺจโยฯ (นว ปญฺหา กาตพฺพาฯ) (สํขิตฺตํ, เหตุเหตุสมฺปยุตฺตทุกํ เหตุสเหตุกทุกสทิสํฯ สํขิตฺตํฯ นว ปญฺหาฯ)

6-1. นเหตุสเหตุกทุก-กุสลตฺติกํ

[35] นเหตุํ สเหตุกํ กุสลํ ธมฺมํ ปฏิจฺจ นเหตุ นสเหตุโก นกุสโล ธมฺโม อุปฺปชฺชติ เหตุปจฺจยาฯ เหตุยา เอกํฯ

นเหตุํ สเหตุกํ อกุสลํ ธมฺมํ ปฏิจฺจ นเหตุ นสเหตุโก นอกุสโล ธมฺโม อุปฺปชฺชติ เหตุปจฺจยาฯ เหตุยา เอกํฯ

นเหตุํ อเหตุกํ อพฺยากตํ ธมฺมํ ปจฺจยา นเหตุ นอเหตุโก นอพฺยากโต ธมฺโม อุปฺปชฺชติ เหตุปจฺจยา ฯ เหตุยา เอกํฯ

เหตุโคจฺฉกํ นิฏฺฐิตํฯ

7-8-1. สปฺปจฺจยาทิทุกานิ-กุสลตฺติกํ